{1:1} איכה ישבה בדד העיר רבתי עם היתה כאלמנה רבתי בגוים שרתי במדינות היתה למס׃
{1:2} בכו תבכה בלילה ודמעתה על לחיה אין לה מנחם מכל אהביה כל רעיה בגדו בה היו לה לאיבים׃
{1:3} גלתה יהודה מעני ומרב עבדה היא ישבה בגוים לא מצאה מנוח כל רדפיה השיגוה בין המצרים׃
{1:4} דרכי ציון אבלות מבלי באי מועד כל שעריה שוממין כהניה נאנחים בתולתיה נוגות והיא מר לה׃
{1:5} היו צריה לראש איביה שלו כי יהוה הוגה על רב פשעיה עולליה הלכו שבי לפני צר׃
{1:6} ויצא מן בת ציון כל הדרה היו שריה כאילים לא מצאו מרעה וילכו בלא כח לפני רודף׃
{1:7} זכרה ירושלם ימי עניה ומרודיה כל מחמדיה אשר היו מימי קדם בנפל עמה ביד צר ואין עוזר לה ראוה צרים שחקו על משבתה׃
{1:8} חטא חטאה ירושלם על כן לנידה היתה כל מכבדיה הזילוה כי ראו ערותה גם היא נאנחה ותשב אחור׃
{1:9} טמאתה בשוליה לא זכרה אחריתה ותרד פלאים אין מנחם לה ראה יהוה את עניי כי הגדיל אויב׃
{1:10} ידו פרש צר על כל מחמדיה כי ראתה גוים באו מקדשה אשר צויתה לא יבאו בקהל לך׃
{1:11} כל עמה נאנחים מבקשים לחם נתנו מחמודיהם באכל להשיב נפש ראה יהוה והביטה כי הייתי זוללה׃
{1:12} לוא אליכם כל עברי דרך הביטו וראו אם יש מכאוב כמכאבי אשר עולל לי אשר הוגה יהוה ביום חרון אפו׃
{1:13} ממרום שלח אש בעצמתי וירדנה פרש רשת לרגלי השיבני אחור נתנני שממה כל היום דוה׃
{1:14} נשקד על פשעי בידו ישתרגו עלו על צוארי הכשיל כחי נתנני אדני בידי לא אוכל קום׃
{1:15} סלה כל אבירי אדני בקרבי קרא עלי מועד לשבר בחורי גת דרך אדני לבתולת בת יהודה׃
{1:16} על אלה אני בוכיה עיני עיני ירדה מים כי רחק ממני מנחם משיב נפשי היו בני שוממים כי גבר אויב׃
{1:17} פרשה ציון בידיה אין מנחם לה צוה יהוה ליעקב סביביו צריו היתה ירושלם לנדה ביניהם׃
{1:18} צדיק הוא יהוה כי פיהו מריתי שמעו נא כל עמים וראו מכאבי בתולתי ובחורי הלכו בשבי׃
{1:19} קראתי למאהבי המה רמוני כהני וזקני בעיר גועו כי בקשו אכל למו וישיבו את נפשם׃
{1:20} ראה יהוה כי צר לי מעי חמרמרו נהפך לבי בקרבי כי מרו מריתי מחוץ שכלה חרב בבית כמות׃
{1:21} שמעו כי נאנחה אני אין מנחם לי כל איבי שמעו רעתי ששו כי אתה עשית הבאת יום קראת ויהיו כמוני׃
{1:22} תבא כל רעתם לפניך ועולל למו כאשר עוללת לי על כל פשעי כי רבות אנחתי ולבי דוי׃
{2:1} איכה יעיב באפו אדני את בת ציון השליך משמים ארץ תפארת ישראל ולא זכר הדם רגליו ביום אפו׃
{2:2} בלע אדני לא חמל את כל נאות יעקב הרס בעברתו מבצרי בת יהודה הגיע לארץ חלל ממלכה ושריה׃
{2:3} גדע בחרי אף כל קרן ישראל השיב אחור ימינו מפני אויב ויבער ביעקב כאש להבה אכלה סביב׃
{2:4} דרך קשתו כאויב נצב ימינו כצר ויהרג כל מחמדי עין באהל בת ציון שפך כאש חמתו׃
{2:5} היה אדני כאויב בלע ישראל בלע כל ארמנותיה שחת מבצריו וירב בבת יהודה תאניה ואניה׃
{2:6} ויחמס כגן שכו שחת מועדו שכח יהוה בציון מועד ושבת וינאץ בזעם אפו מלך וכהן׃
{2:7} זנח אדני מזבחו נאר מקדשו הסגיר ביד אויב חומת ארמנותיה קול נתנו בבית יהוה כיום מועד׃
{2:8} חשב יהוה להשחית חומת בת ציון נטה קו לא השיב ידו מבלע ויאבל חל וחומה יחדו אמללו׃
{2:9} טבעו בארץ שעריה אבד ושבר בריחיה מלכה ושריה בגוים אין תורה גם נביאיה לא מצאו חזון מיהוה׃
{2:10} ישבו לארץ ידמו זקני בת ציון העלו עפר על ראשם חגרו שקים הורידו לארץ ראשן בתולת ירושלם׃
{2:11} כלו בדמעות עיני חמרמרו מעי נשפך לארץ כבדי על שבר בת עמי בעטף עולל ויונק ברחבות קריה׃
{2:12} לאמתם יאמרו איה דגן ויין בהתעטפם כחלל ברחבות עיר בהשתפך נפשם אל חיק אמתם׃
{2:13} מה אעודך מה אדמה לך הבת ירושלם מה אשוה לך ואנחמך בתולת בת ציון כי גדול כים שברך מי ירפא לך׃
{2:14} נביאיך חזו לך שוא ותפל ולא גלו על עונך להשיב שביתך ויחזו לך משאות שוא ומדוחים׃
{2:15} ספקו עליך כפים כל עברי דרך שרקו וינעו ראשם על בת ירושלם הזאת העיר שיאמרו כלילת יפי משוש לכל הארץ׃
{2:16} פצו עליך פיהם כל אויביך שרקו ויחרקו שן אמרו בלענו אך זה היום שקוינהו מצאנו ראינו׃
{2:17} עשה יהוה אשר זמם בצע אמרתו אשר צוה מימי קדם הרס ולא חמל וישמח עליך אויב הרים קרן צריך׃
{2:18} צעק לבם אל אדני חומת בת ציון הורידי כנחל דמעה יומם ולילה אל תתני פוגת לך אל תדם בת עינך׃
{2:19} קומי רני בליל לראש אשמרות שפכי כמים לבך נכח פני אדני שאי אליו כפיך על נפש עולליך העטופים ברעב בראש כל חוצות׃
{2:20} ראה יהוה והביטה למי עוללת כה אם תאכלנה נשים פרים עללי טפחים אם יהרג במקדש אדני כהן ונביא׃
{2:21} שכבו לארץ חוצות נער וזקן בתולתי ובחורי נפלו בחרב הרגת ביום אפך טבחת לא חמלת׃
{2:22} תקרא כיום מועד מגורי מסביב ולא היה ביום אף יהוה פליט ושריד אשר טפחתי ורביתי איבי כלם׃
{3:1} אני הגבר ראה עני בשבט עברתו׃
{3:2} אותי נהג וילך חשך ולא אור׃
{3:3} אך בי ישב יהפך ידו כל היום׃
{3:4} בלה בשרי ועורי שבר עצמותי׃
{3:5} בנה עלי ויקף ראש ותלאה׃
{3:6} במחשכים הושיבני כמתי עולם׃
{3:7} גדר בעדי ולא אצא הכביד נחשתי׃
{3:8} גם כי אזעק ואשוע שתם תפלתי׃
{3:9} גדר דרכי בגזית נתיבתי עוה׃
{3:10} דב ארב הוא לי אריה במסתרים׃
{3:11} דרכי סורר ויפשחני שמני שמם׃
{3:12} דרך קשתו ויציבני כמטרא לחץ׃
{3:13} הביא בכליותי בני אשפתו׃
{3:14} הייתי שחק לכל עמי נגינתם כל היום׃
{3:15} השביעני במרורים הרוני לענה׃
{3:16} ויגרס בחצץ שני הכפישני באפר׃
{3:17} ותזנח משלום נפשי נשיתי טובה׃
{3:18} ואמר אבד נצחי ותוחלתי מיהוה׃
{3:19} זכר עניי ומרודי לענה וראש׃
{3:20} זכור תזכור ותשיח עלי נפשי׃
{3:21} זאת אשיב אל לבי על כן אוחיל׃
{3:22} חסדי יהוה כי לא תמנו כי לא כלו רחמיו׃
{3:23} חדשים לבקרים רבה אמונתך׃
{3:24} חלקי יהוה אמרה נפשי על כן אוחיל לו׃
{3:25} טוב יהוה לקוו לנפש תדרשנו׃
{3:26} טוב ויחיל ודומם לתשועת יהוה׃
{3:27} טוב לגבר כי ישא על בנעוריו׃
{3:28} ישב בדד וידם כי נטל עליו׃
{3:29} יתן בעפר פיהו אולי יש תקוה׃
{3:30} יתן למכהו לחי ישבע בחרפה׃
{3:31} כי לא יזנח לעולם אדני׃
{3:32} כי אם הוגה ורחם כרב חסדו׃
{3:33} כי לא ענה מלבו ויגה בני איש׃
{3:34} לדכא תחת רגליו כל אסירי ארץ׃
{3:35} להטות משפט גבר נגד פני עליון׃
{3:36} לעות אדם בריבו אדני לא ראה׃
{3:37} מי זה אמר ותהי אדני לא צוה׃
{3:38} מפי עליון לא תצא הרעות והטוב׃
{3:39} מה יתאונן אדם חי גבר על חטאו׃
{3:40} נחפשה דרכינו ונחקרה ונשובה עד יהוה׃
{3:41} נשא לבבנו אל כפים אל אל בשמים׃
{3:42} נחנו פשענו ומרינו אתה לא סלחת׃
{3:43} סכתה באף ותרדפנו הרגת לא חמלת׃
{3:44} סכותה בענן לך מעבור תפלה׃
{3:45} סחי ומאוס תשימנו בקרב העמים׃
{3:46} פצו עלינו פיהם כל איבינו׃
{3:47} פחד ופחת היה לנו השאת והשבר׃
{3:48} פלגי מים תרד עיני על שבר בת עמי׃
{3:49} עיני נגרה ולא תדמה מאין הפגות׃
{3:50} עד ישקיף וירא יהוה משמים׃
{3:51} עיני עוללה לנפשי מכל בנות עירי׃
{3:52} צוד צדוני כצפור איבי חנם׃
{3:53} צמתו בבור חיי וידו אבן בי׃
{3:54} צפו מים על ראשי אמרתי נגזרתי׃
{3:55} קראתי שמך יהוה מבור תחתיות׃
{3:56} קולי שמעת אל תעלם אזנך לרוחתי לשועתי׃
{3:57} קרבת ביום אקראך אמרת אל תירא׃
{3:58} רבת אדני ריבי נפשי גאלת חיי׃
{3:59} ראיתה יהוה עותתי שפטה משפטי׃
{3:60} ראיתה כל נקמתם כל מחשבתם לי׃
{3:61} שמעת חרפתם יהוה כל מחשבתם עלי׃
{3:62} שפתי קמי והגיונם עלי כל היום׃
{3:63} שבתם וקימתם הביטה אני מנגינתם׃
{3:64} תשיב להם גמול יהוה כמעשה ידיהם׃
{3:65} תתן להם מגנת לב תאלתך להם׃
{3:66} תרדף באף ותשמידם מתחת שמי יהוה׃
{4:1} איכה יועם זהב ישנא הכתם הטוב תשתפכנה אבני קדש בראש כל חוצות׃
{4:2} בני ציון היקרים המסלאים בפז איכה נחשבו לנבלי חרש מעשה ידי יוצר׃
{4:3} גם תנין חלצו שד היניקו גוריהן בת עמי לאכזר כי ענים במדבר׃
{4:4} דבק לשון יונק אל חכו בצמא עוללים שאלו לחם פרש אין להם׃
{4:5} האכלים למעדנים נשמו בחוצות האמנים עלי תולע חבקו אשפתות׃
{4:6} ויגדל עון בת עמי מחטאת סדם ההפוכה כמו רגע ולא חלו בה ידים׃
{4:7} זכו נזיריה משלג צחו מחלב אדמו עצם מפנינים ספיר גזרתם׃
{4:8} חשך משחור תארם לא נכרו בחוצות צפד עורם על עצמם יבש היה כעץ׃
{4:9} טובים היו חללי חרב מחללי רעב שהם יזובו מדקרים מתנובת שדי׃
{4:10} ידי נשים רחמניות בשלו ילדיהן היו לברות למו בשבר בת עמי׃
{4:11} כלה יהוה את חמתו שפך חרון אפו ויצת אש בציון ותאכל יסודתיה׃
{4:12} לא האמינו מלכי ארץ וכל ישבי תבל כי יבא צר ואויב בשערי ירושלם׃
{4:13} מחטאת נביאיה עונות כהניה השפכים בקרבה דם צדיקים׃
{4:14} נעו עורים בחוצות נגאלו בדם בלא יוכלו יגעו בלבשיהם׃
{4:15} סורו טמא קראו למו סורו סורו אל תגעו כי נצו גם נעו אמרו בגוים לא יוסיפו לגור׃
{4:16} פני יהוה חלקם לא יוסיף להביטם פני כהנים לא נשאו זקנים לא חננו׃
{4:17} עודינה תכלינה עינינו אל עזרתנו הבל בצפיתנו צפינו אל גוי לא יושע׃
{4:18} צדו צעדינו מלכת ברחבתינו קרב קצינו מלאו ימינו כי בא קצינו׃
{4:19} קלים היו רדפינו מנשרי שמים על ההרים דלקנו במדבר ארבו לנו׃
{4:20} רוח אפינו משיח יהוה נלכד בשחיתותם אשר אמרנו בצלו נחיה בגוים׃
{4:21} שישי ושמחי בת אדום יושבתי בארץ עוץ גם עליך תעבר כוס תשכרי ותתערי׃
{4:22} תם עונך בת ציון לא יוסיף להגלותך פקד עונך בת אדום גלה על חטאתיך׃
{5:1} זכר יהוה מה היה לנו הביט וראה את חרפתנו׃
{5:2} נחלתנו נהפכה לזרים בתינו לנכרים׃
{5:3} יתומים היינו אין אב אמתינו כאלמנות׃
{5:4} מימינו בכסף שתינו עצינו במחיר יבאו׃
{5:5} על צוארנו נרדפנו יגענו לא הונח לנו׃
{5:6} מצרים נתנו יד אשור לשבע לחם׃
{5:7} אבתינו חטאו אינם אנחנו עונתיהם סבלנו׃
{5:8} עבדים משלו בנו פרק אין מידם׃
{5:9} בנפשנו נביא לחמנו מפני חרב המדבר׃
{5:10} עורנו כתנור נכמרו מפני זלעפות רעב׃
{5:11} נשים בציון ענו בתלת בערי יהודה׃
{5:12} שרים בידם נתלו פני זקנים לא נהדרו׃
{5:13} בחורים טחון נשאו ונערים בעץ כשלו׃
{5:14} זקנים משער שבתו בחורים מנגינתם׃
{5:15} שבת משוש לבנו נהפך לאבל מחלנו׃
{5:16} נפלה עטרת ראשנו אוי נא לנו כי חטאנו׃
{5:17} על זה היה דוה לבנו על אלה חשכו עינינו׃
{5:18} על הר ציון ששמם שועלים הלכו בו׃
{5:19} אתה יהוה לעולם תשב כסאך לדר ודור׃
{5:20} למה לנצח תשכחנו תעזבנו לארך ימים׃
{5:21} השיבנו יהוה אליך ונשוב חדש ימינו כקדם׃
{5:22} כי אם מאס מאסתנו קצפת עלינו עד מאד׃